نصائح لطلبة الصف الأول – تخطيط عمراني

كنت قد وعدت بكتابة هذه التدوينة منذ عدة أيام..تأخرت قليلاً، لكن لا بأس لازلنا في الأسبوع الثاني للدراسة، ولاريب ان هناك البعض ممن قد ينتفع بهذه النصائح البسيطة. بالطبع كما يقول العنوان فهذه النصائح مُقدمة لطلبة العام الأول، أو المرحلة التمهيدية كما يطلقون عليها الان..كان الله في عون الجميع. إذا سمحتم لي فأستخدم العامية طلباً للأريحية

• ستلاحظ منذ أول يوم انهم ينادوينك في الرايحة والجاية بـ(يا بشمهندس)، و(يا بشمهندسة)..عشان خاطري ما تعيش في الدور، وتفتكر انك بقيت مهندس خلاص بمجرد الدخول..لسه قدامك كتير اوي تتعلمه، وغالباً هتفضل حمار لحد ما تخلص تالتة او يمكن رابعة كمان.
• عشان خاطري برضه اتخلي شوية عن أخلاق ثانوي وأكبر شوية..خصوصاً لو كنت ولد، يعني ما تتريقش مثلاً علي دكاترتك وأساتذتك ابداً أياً كانوا..يعني هتقابل دكاترة بتدخل تتكلم وهي نايمة، وهتلاقي دكاترة بتتكلم بسرعة، او بتتكلم ببطء، اللي صوته عالي واللي صوته واطي، اللي بيقول مصطلحات انجليزي كتير، واللي بيقول فرنساوي، ارجوك مادام دكتورك من تخطيط احترمـه..التريقة دي خليها للي جايلك منتدب من آداب، او من سياسة و اقتصاد ، لأن دول ملناش احنا فيهم بصراحة.
• احترم الكبير بس ما تسمعش كلامه !..اللي يقولك المادة دي كذا، والدكتور الفلاني كذا..اسمع وخرج من الودن التانية..جرب بنفسك كل حاجة، ومتخدش انطباعات من حد.
• ما تسرقش شغل من حد كبير وتقدمه بأسمك..وما تخليش حد يعملك شغلك..امال انتا جاي ليه؟..عايز تتعلم ولا مش عايز؟..اقعد خلص شغلك بنفسك.
• مش مهم الدرجات..مش مهم الترتيب..مش مهم كل الكلام الفاضي ده..انتا اتعلمت حاجة ولا لا؟.انتا بتعرف تعمل حاجة ولا لا؟..ده اللي هيفرق معاك في الاخر.
• لاحظ ملحوظة مهمة : المكتبة فيها الأساسيات..وفيها القوانين العامة. لكن الأنترنت فيه أخر الدوريات، وأحدث النظريات..ده الفرق بين الاتنين.
• البساطة !..حاول تفهم معني الكلمة دي!..ليه التعقيد في التصميم؟ ليه التعقيد في إظهار اللوحة؟..لو طبقت مفهوم “البساطة” صح..بس يكون “البساطة” الصحيحة مش “الاستسهال” هتوصل لنتيجة كويسة.
• تذكر دائماً : المحترف هو اللي بيخلص كمية أكبر في وقت أقل، بجودة عالية.
• افتكر كويس : مش عشان كل الناس بتتأخر في الكلية بالليل، يبقي الكلية لازم نتأخر فيها بالليل !..لو قعدت تخلص شغلك بجد، وفي نيتك تخلص شغلك بجد..هتخلص وتمشي بدري.
• حاول تحسس نفسك علي طول انك طالب في جامعة، وفي كلية هندسية..يعني لو عندك تسليمة بحثية..بمعني الدكتور طلب منك (تصور عن كذا في ضوء كذا)، او (نظرة نقدية علي نظريات كذا)، ليه ماتستخدمش الانترنت؟..وليه ما تترجمش حاجات حديثة أمريكية وأوروبية وتحطها؟..مرة كنت مُطالب ببحث في ديزاين عن تصميم الحضانة، وما بدأتش غير ليلة التسليمة، طبعاً لقيت معلومات كتيرة جداً علي الأنترنت، وصور واسكتشات روعة، بس لقيت اني بالشكل ده هقضي ليلتي كلها في النقل والترجمة والتنسيق، فأتخذت قرار ارتجالي اني اعمل البحث بالانجلش!..وعملت البحث كله بالأمريكية بالتحليلات، بمُقتبسات مُعنونة من ويكيبديا، و تايم سيفر time saver. وحصلت في اليوم التالي علي (B+)، وكتبلي د.أبو الفتوح علي صفحة البحث : مجهود طيب، ولكنه بحاجه للتطوير، والتعريب ..ما أقصده من هذه القصة هو انه ليست لديك قيود، ويمكنك ان تفعل ما شئت..فقط حاول ان تبتكر، وان تكون لديك جرأة العمل.
• بلاش والنبي الأسئلة الذكية من طراز (ورق ابيض ولا ملون)، (ورق مسطر ولا سادة)..ببساطة : انتا حر، اعمل اللي انتا عايزه..المعيد هيصحح لك هو انتا عامل شغلك علي ورق بفرة..بس نضيف.
• ليه ما تستخدمش الكمبيوتر؟..مبتعرفش؟..ليه؟..سهلة جداً..عندك أسهل برنامج هندسي في الكون : الأوتوكاد. ده ممكن تعمل بيه كل حاجة..سيبك من الفوتوشوب، والماكس، وكل الناس اللي بتقعد تحور عشان تشتتك..لو أتقنت الاوتوكاد، وركزت فيه ممكن تعمل بيه كل شغلك. طبعاً مش بقولك ماتتعلمش غيره، بس بحاول أبسطلك الدنيا. (طبعاً ممكن يقولوا لك بلاش الكمبيوتر في سنة أولي، ماشي..بس مش هيجري حاجة لما تتعلمه..انا اتعلمت الأوتوكاد في سنة أولي في إجازة نص السنة، واتعلمت الفوتوشوب بعد التيرم التاني)..الخلاصة : مفيش داعي تتأخر..أنا وفريق عمل نيكست باوندري كنا المجموعة الأولي اللي بتشتغل بالكمبيوتر في كل حاجة لما كنا في سنة تانية !
• بالمناسبة استخدام الكمبيوتر مش انك تجيب اللاب توب وتقعد في الكلية مشغل أغاني بصوت عالي..انا في سنة رابعة، وما بجيبش اللاب الا نادراً..حاول لما تستخدم الكمبيوتر في شغلك تستخدمه صح، يعني انتا لو بتشتغل بالكمبيوتر، وطلعت شغل زي زمايلك اللي بيشتغلوا مانيوال يبقي فيه حاجة غلط عندك!..لازم لما أبص في شغلك وانتا عامله بالكمبيوتر، ما اعرفش ساعتها انتا عامله ازاي!
• النقطة المعتادة : طبعاً بتسأل ع الشغل برة..نفسي افهم مستعجل ليه؟..هتشتغل برة ازاي وانتا مش مركز تتعلم حاجة في الكلية الأول؟..وكل واحد يسألني السؤال المعتاد : فيه شغل لخريجي الكلية ولا لا؟..بتغاظ بصراحة..مش يمكن تقوم حرب..مش بذمتكم احنا علي أعتاب حرب، مع اسرائيل او مع ايران، او حتي مع الجزاير-بمناسبة مباراة اربعتاشر نوفمبر، ربنا يستر – ساعتها هنلاقي شغل فين والنبي، غير ع الجبهة طبعاً !..اصبر وما تستعجلش..لو اتعلمت في الكلية، هتشتغل هوا، والف مكان هيطلبك، حتي وانتا خريج حديث بدون خبرة..لكن لو شغلت نفسك بالتفكير وما اتعلمتش حاجة.. ساعتها سوري بقي..انتا اللي جنيت علي نفسك.
• انا مبعرفش اشتغل في عمل جماعي (الا لو كان الجماعي دول اصحابي-ودول يتعدوا علي اصابع الايد الواحدة- او حبايبي-ودول يتعدوا علي صباع واحد بس -)..بس نصيحتي هي حاول تطور من نفسك وتفهم أساليب العمل الجماعي، طبعاً ده بالقراية مش بالفهلوة..انا عملت كدة وجربته في التيرم الأول من سنة تالتة، بس مكملتش لأسباب خاصة بيا..جرب انتا وشوف، الشغل كتير بيبقي مجموعات..هتحتاج النصيحة دي أكيد، عشان متكرهش نفسك.
• نصيحتي الأخيرة الان : ماتسيبش وقتك كله للكلية..حاول تمارس حاجة جنبيها ولو أسبوعياً..انا ببقي متابع مسلسل معين مثلاً بمعدل حلقة كل يوم او يومين، علي الكمبيوتر بجانب الدراسة..ممكن كتاب خفيف تغير فيه جو بعد ما تروح، أو بين مراحل تسليمة ما..ممكن خروجة طبعاً لو كنت من هواه التسكع، لكنني أري ان تغذية العقل أفضل

حسناً..هذا ما لدي الان، لكني قد اتحدث في مرة أخري قادمة عن فنيات عمل متقدمة..لنري أولاً ما اذا كان هناك من سيحب هذه الكلمات ام لا. نراكم علي خير.

ملحوظة أخيرة خاصة : ثمة إصرار غريب من البعض مؤخراً علي التدخل في حياتي الخاصة، وطبعاً هذا يضايقني كالجحيم، ولكن عزائي انهم نالوا ما يكفي من التقريع بالكلمات، لعل هذا يكوّن سوراً مكهرباً إذا حاولوا الأقتراب من هذه المنطقة مرة أخري..قديماً قالوا حكمة لطيفة : تدخل فيما لا يُعنيك..تنل ما لايُرضيك!

ملحوظة أخري أكثر سخافة : في ندوة لد.أحمد خالد توفيق مؤخراً في ملامح بوك ستورز بمدينة نصر، وجدت العاملة تطالبني بعشرة جنيه مينمال تشارج..قلت لها بوضوح : يبدو ان أعمالكم تعاني الكساد، فتحاولون الكسب علي قفا قراء د.أحمد..رفضت الدفع طبعاً، وقيل لي فيما بعد ان أحمد العايدي بدوره رفض الدفع، وصنع صخباً..ثم اُرسل لي فيما بعد ايضاً بوصلة لرد من د.أحمد نفسه حول هذا الموضوع. يبدو ان البعض يُصر علي عدم العدم التعامل بأحترافية برغم كل شئ..هذا العالم صار يعج بالهواه!

ونـراكم علي خير، ان شـاء الله.